[ English ] [ 中文 ]
0891-6325020
དབུ་ཤོག>རྩོམ་རིག་སྒྱུ་རྩལ།>བོད་ཀྱི་རྩོམ་རིག
  • ཀྲུང་གོ་གསར་པ་དབུ་བརྙེས་ནས་བགྲང་བྱ་བདུན་ཅུ་འཁོར་བའི་དགའ་སྟོན་མཆོད་སྤྲིན།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།   ཆོས་འབྲོག་ཉི་མ་དོན་ལགས།    |    སྤེལ་དུས།   2019-10-06

    འཇིག་རྟེན་གོ་ལའི་འཕོ་འགྱུར་ཆར་རླུང་གཡོས། །

    བསྐལ་བརྒྱའི་ཆུ་ཀླུང་ལང་ལོང་དགུང་དུ་འཕྱུར། །

    དབང་ཕྱོགས་ལྷུམས་སུ་རིན་ཆེན་འབྱུང་གནས་ཆགས། །

    ཀྲུང་ཧྭ་མི་རིགས་གཡུ་འབྲུག་ཚང་དུ་འཁྱིལ། །

    འགལ་འདུ་འཇོམས་པའི་རླུང་གི་འཁོར་ལོ་བསྐོར། །

    ཉམས་མྱོང་ངེས་ཤེས་སྤྲིན་གྱི་བང་རིམ་འཁྲིགས། །

    རང་བྱུང་ཁམས་ལ་འཐབ་རྩོད་གློག་ཞགས་འཁྱུག །

    བགྲང་བྱ་ལྔ་སྟོང་ཤེས་རིག་འབྲུག་སྟོང་ལྡིར། །

    གོ་ལའི་དབྱིངས་སུ་གསར་བརྗེའི་སྐྱ་མདའ་བཏང་། །

    མེས་རྒྱལ་མཚན་མོའི་སྨག་རུམ་འཆིང་རྒྱ་གྲོལ། །

    ཕྱི་དགྲ་འབྱུང་པོའི་བྱ་ཚོགས་རང་ཚུལ་བསལ། །

    ཀྲུང་ཧྭ་མི་རིགས་ཉིན་མོའི་དཔལ་ལ་ཕྱོགས། །

    ཚན་རྩལ་ཤེས་རིག་དགོས་འདོད་ཆར་དུ་བསྙིལ། །

    རང་དབང་དམངས་གཙོའི་དབྱར་གྱི་ཆུ་ཀླུང་བཞུར། །

    མར་ལེ་གཞུང་ལུགས་རྒྱ་མཚོའི་ཀློང་ཡངས་གཡོས། །

    ཀྲུང་གོ་གསར་པའི་ཟླ་བ་མཁའ་ལ་འཕགས། །

    བགྲང་བྱ་བདུན་ཅུའི་འཕོ་འགྱུར་ཀླུ་དབང་མཐུས། །

    ཕན་བདེའི་དབུ་བ་འཛུམ་དཀར་ཆུ་ཀླུང་འཕེལ། །

    མེས་རྒྱལ་ལེགས་བྱས་རྩི་ཤིང་ནགས་ཚལ་རྒྱས། །

    དགའ་སྟོན་མཆོད་སྤྲིན་མེ་ཏོག་ཞལ་ཁ་ཕྱེ། །

    དབུལ་ཕོངས་རྗེས་ལུས་མྱ་ངམ་ཐང་ཆེན་པོར། །

    དར་རྒྱས་གོང་འཕེལ་དཔྱིད་ཀྱི་དྲོད་རླུང་བསུས། །

    སྤྱི་ཚོགས་རིང་ལུགས་སྤྲིན་གྱི་མེ་ཏོག་བཞད། །

    ཆབ་དཔལ་རིག་གསུམ་རྩི་ཤིང་ལོ་ཏོག་རྒྱས། །

    ཡང་དག་སྲིད་ཇུས་ཉིན་བྱེད་མཁའ་ལ་འཕགས། །

    ཁྲོམ་རའི་དཔལ་འབྱོར་པདྨོའི་འཛུམ་མདངས་བཞད། །

    དཔལ་འབྱོར་འཛུགས་སྐྲུན་སྐྱེད་ཚལ་མཛེས་སྡུག་རྒྱས། །

    དམངས་ཡོངས་ཕྱུག་འགྱུར་བུང་བ་གར་ལ་རྩེན། །

    ཚུལ་མིན་རུལ་སུངས་སྤྲིན་ནག་ཕ་མཐར་བཅིལ། །

    ཏང་སྲོལ་སྲིད་གཙང་མཁའ་དབྱིངས་རང་མདངས་གསལ། །

    དམངས་ཀྱི་ཕན་བདེའི་འཇའ་འོད་གུར་ཁང་ཕུབ། །

    ཞི་ཅིན་ཕིང་གི་དགོངས་པའི་ཉིན་བྱེད་འབར། །

    ཞའོ་ཕིང་རིག་གཞུང་འཁོར་ལོ་མདུན་དུ་འདྲེན། །

    མཚོན་བྱེད་གསུམ་གྱི་དཔལ་བེའུའི་མཛེས་རིས་བཀྲ། །

    ཚན་རིག་གོང་འཕེལ་ལྟ་བའི་གསེར་ཉ་འཁྱུག །

    སྤྱི་ཚོགས་རིང་ལུགས་རྒྱལ་མཚན་དགུང་དུ་འདེགས། །

    དམངས་འཚོ་ལེགས་སྒྱུར་གདུགས་ཀྱི་གྲིབ་བསིལ་སྣུམ། །

    དཔལ་ཡོན་སྣ་འཛོམས་པདྨོ་རྣམ་པར་བཞད། །

    མངའ་ཐང་ལོངས་སྤྱོད་བུམ་པ་བདུད་རྩིས་གཏམས། །

    ཚོགས་ཆེན་བཅོ་བརྒྱད་དུང་དཀར་གཡས་སུ་འཁྱིལ། །

    ཐོག་མའི་བསམ་འདུན་རྦ་རླབས་མཁའ་ལ་འཕྱུར། །

    ལོ་རྒྱུས་འགན་འཁྲིའི་ནོར་བུ་ཀློང་དུ་སྦྲུམ། །

    དམངས་ཀྱི་ཕན་བདེ་བརླན་གཤེར་དཔལ་གྱིས་ཕྱུག །

    ཏང་གཤིས་འཛུགས་སྐྱོང་རྒྱ་མཚོའི་གཏིང་མཐའ་ཡངས། །

    རྒྱུད་གཅིག་ལམ་གཅིག་གླང་ཆེན་མཚོ་ལ་འཇུག །

    ཀྲུང་ཧྭ་བསྐྱར་དར་རྟ་མཆོག་རླུང་གཤོག་རྒྱས། །

    འབྱོར་འབྲིང་སྤྱི་ཚོགས་མདུན་སྐྱོད་འཁོར་ལོར་ཞུགས། །

    ཀྲུང་གོའི་ཕུགས་འདུན་རྒྱལ་སྲིད་མངའ་ཐང་དར། །

    དྲོ་འཇམ་རེག་བྱས་སྐྱེ་འགྲོར་དགའ་བདེ་སྦྱིན། །

    འདོད་ཡོན་སུམ་རྩེན་གནས་ལ་བསྒྲུན་པར་ནུས། །

    བགྲང་བྱ་བདུན་ཅུའི་ཀྲུང་གོའི་དཔལ་ཡོན་ལ། །

    འཆི་མེད་སྐྱེངས་ཏེ་སྲུང་མའི་རང་ཚུགས་འཛིན། །

    བགྲང་བྱ་བདུན་ཅུའི་འཕོ་འགྱུར་དཀར་མདངས་རྒྱས། །

    ཕན་བདེའི་དཔལ་ཡོན་ལོ་རྒྱུས་མཁའ་དབྱིངས་གསལ། །

    འཇིག་རྟེན་རྨོངས་མུན་སེལ་བའི་དཔལ་ལྡན་པ། །

    ཕན་བདེའི་བྱིན་རླབས་གཟི་འོད་རྣམ་པར་བཀྲ། །

    བཀྲ་ཤིས་བགྲང་བྱ་བདུན་ཅུའི་འཁྲུངས་སྐར་བསུས། །

    བཀྲ་ཤིས་ཀྲུང་གོ་གསར་པའི་དཔལ་ཡོན་མངོན། །

    བཀྲ་ཤིས་རྫོགས་ལྡན་སྐལ་བཟང་དགའ་བདེའི་ཁྲོད། །

    བཀྲ་ཤིས་མེས་རྒྱལ་རྣམ་པར་རྒྱལ་གྱུར་ཅིག །

    --    --

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།