[ English ] [ 中文 ]
0891-6325020
དབུ་ཤོག>གསར་འགྱུར།>རྒྱལ་ནང་།རྒྱལ་སྤྱི།>རྒྱལ་ནང་།
  • ཀན་སུའུ་ཡི་དབུལ་སྒྲོལ་འགག་སྒྲོལ་ལ་ཐག་གཅོད་རང་བཞིན་གྱི་གྲུབ་འབྲས་ཐོབ་པ།

  • ཡོང་ཁུངས།   མི་དམངས་ཉིན་རེའི་ཚགས་པར།    |    རྩོམ་པ་པོ།   མི་དམངས་ཉིན་རེའི་​ཚགས་པར་གྱི་གསར་འགོད་པ། ཀུའོ་ཧྲུའུ་རན་གྱིས།    |    སྤེལ་དུས།   2019-06-13

    ཟླ་6ཚེས་5ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་གཉེར་བའི་ཀྲུང་གོ་གསར་པ་དབུ་བརྙེས་ནས་ལོ་70འཁོར་བའི་ཞིང་ཆེན(རང་སྐྱོང་ལྗོངས་དང་གྲོང་ཁྱེར)གྱི་བརྗོད་དོན་གཙོ་བོ་རབ་དང་རིམ་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ཀན་སུའུ་ཞིང་ཨུད་ཀྱི་ཧྲུའུ་ཅི་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ལིན་ཏུའོ་དང་ཧྲེང་ཀྲང་ཐང་རེན་ཅན་གྱིས“གོ་སྐབས་དམ་འཛིན་དང་སྒྱུར་བཅོས་ལ་སྐུལ་མ་བཏང་ནས་ལུང་ཡོན་གྱི་འགྱུར་ལྡོག་ཆེན་པོར་གཞོལ། དབུལ་ཕོངས་སེལ་བ་དང་སྣོད་བཅུད་ལ་མཐོང་ཆེན་གྱིས་དམངས་ཕྱུག་ཡུལ་དར་ཡོང་བར་བརྩོན”ཞེས་པའི་ཀྲུང་གོ་གསར་པ་དབུ་བརྙེས་ནས་ལོ་70འཁོར་བའི་ཀན་སུའུ་འཕེལ་རྒྱས་ཀྱི་གྲུབ་འབྲས་སྐོར་གྱི་གནས་ཚུལ་ངོ་སྤྲོད་བྱས་པ་མ་ཟད། གསར་འགོད་པས་བཏོན་པའི་དྲི་བར་ཡང་ལན་བཏབ་པ་རེད།

    དམིགས་ཚད་ཀྱི་གོམ་ཆེན་སྤོས་པས། བདེ་སྐྱིད་ཚོར་སེམས་དང་ཐོབ་ཚོར་ཟབ་ཏུ་ཕྱིན་པ།

    སྔོན་ཆད་ཀན་སུའུ་རུ་དབུལ་ཕོངས་ཀྱི་ཁྱབ་རྒྱ་ཆེ་བ་དང་། དབུལ་ཕོངས་མི་འབོར་མང་བ། དབུལ་ཕོངས་ཚད་གཞི་ཟབ་པ་བཅས་ཡོད། 2012ལོའི་ལོ་མཇུག་ཏུ་རེས་སྐོར་གསར་པའི་དབུལ་སྒྲོལ་འགག་སྒྲོལ་གྱི་དམག་འཐབ་རྒྱག་སྐབས་ཀན་སུའུ་རུ་མི་འབོར་དབུལ་པོ་ཁྱོན་ཁྲི་692ཡོད་པ་དང་དབུལ་པོར་འགྱུར་ཚད་33.2%ཟིན་ཞིང་། ཞིང་ཆེན་དེ་ཡོངས་ཀྱི་རྫོང་86ཁྲོད་58རྒྱལ་ཁབ་ཀྱི་གཅིག་སྡུད་ཡུག་འབྲེལ་གྱི་ཤིན་ཏུ་དབུལ་བའི་ས་ཁུལ་གྲས་སུ་བཅུག་པ་དང་། དབུལ་སྐྱོར་གསར་སྤེལ་གྱི་ལས་འགན་ཧ་ཅང་དཀའ་ཚེགས་ཆེ་བ་ཞིག་ཡོད།

    “ལོ་70ཡི་རིང་། ལུང་ཡོན་ས་གཞིར་གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར་བྱུང་ཡོད”ཀན་སུའུ་ཡིས་གནད་སྨིན་བྱེད་ཐབས་ལག་བསྟར་ཏན་ཏིག་དང་། དབུལ་སྒྲོལ་དམིགས་ཚད་ཚད་གཞིར་དམ་པོར་དམིགས་པ། ཤིན་ཏུ་དབུལ་པོ་སེལ་རྒྱུར་ཤུགས་སྣོན་རྒྱག་པ། དབུལ་སྒྲོལ་བརྟན་པོ་དང་རྒྱུན་བསྲིང་ཡོང་བའི་འགན་ལེན་སོགས་ཀྱི་ཐད་ནས་གཞི་ཚུགས་ཏེ་འབད་པས་དབུལ་སྒྲོལ་འགག་སྒྲོལ་ལ་ཐག་གཅོད་རང་བཞིན་གྱི་གྲུབ་འབྲས་ཐོབ་པ་རེད། ན་ནིང་གི་ལོ་མཇུག་བར་ཞིང་ཆེན་དེ་ཡོངས་སུ་རིམ་རྩིས་བྱས་ན་མི་ཁྲི་581དབུལ་པོ་ལས་བསྒྲལ་བ་དང་། མི་འབོར་དབུལ་པོ་ཁྲི་111བར་ཇེ་ཉུང་དུ་སོང་ནས་དབུལ་པོར་འགྱུར་ཚད་5.6%བར་ཆག་ཡོད། རྫོང་དབུལ་པོ་75ཡི་ནང་ནས་36དབུལ་སྒྲོལ་ཞྭ་འཕུད་ཐུབ་སྟེ་ཕྱོགས་ཡོངས་ནས་འབྱོར་འབྲིང་དམིགས་ཚད་ཀྱི་ཕྱོགས་སུ་གོམ་ཞེང་ཆེན་པོ་ཞིག་སྤོས་ཡོད་ཅེས་ལིན་ཏུའོ་ཡིས་ངོ་སྤྲོད་བྱས་པ་རེད།

    ཐང་རེན་ཅན་གྱིས་ཟ་མ་དང་། འཐུང་ཆུ། འགྲོ་ལམ་བཅས་ཕྱོགས་གསུམ་ནས་མང་ཚོགས་ཀྱི་བདེ་སྐྱིད་ཚོར་སེམས་དང་ཐོབ་ཚོར་ཆེ་རུ་བརྟན་པོར་འགྲོ་བའི་ཡོང་ཁུངས་ལ་དབྱེ་ཞིབ་བྱས་ཤིང་། “ན་ནིང་རང་ཞིང་ཆེན་གྱི་ལོ་ཧྲིལ་པོའི་འབྲུ་རིགས་ཐོན་འབབ་ཏུན་ཁྲི་1100ཟིན་པ་དང་མི་རེའི་ཆ་སྙོམས་འབྲུ་རིགས་ཐོན་འབབ་སྤྱི་རྒྱ་400ལྷག་ཟིན་ནས་ཡུན་རིང་ཁ་ཐང་པོ་ནས་ཞིང་ཆེན་ནང་ཁུལ་གྱི་རང་མཁོ་དོ་སྙོམས་དང་ལོ་ལེགས་ཡག་པོ་བྱུང་སྟེ་འབྲུ་རིགས་དག་ཞིང་ཆེན་ཕྱིར་དབོར་རྒྱུ་ཡོད་པར་གྱུར། དབྱིན་ཐའོ་ཆུ་མཁོ་སྤྲོད་དུས་ཐེངས་དང་པོ་སོགས་ཆུ་བེད་ལས་གྲྭ་གལ་ཆེན་ཁག་གཅིག་ལས་གྲོང་གསེབ་ཀྱི་མི་འབོར་ཁྲི་933གྱི་འཐུང་ཆུའི་བདེ་འཇགས་ཐད་ཀྱི་དཀའ་ངལ་བསལ་ནས་གྲོང་གསེབ་ཏུ་ཆུ་ཀ་ལ་ཁྱབ་ཚད་88%ཟིན་ཡོད།”

    དོ་གནད་དམ་འཛིན་གྱིས། ཐོན་ལས་དབུལ་སྐྱོར་དང་ཡུལ་སྐོར་དབུལ་སྐྱོར་ལ་རྒྱུན་བསྲིང་ཤུགས་འདོན་བྱས་པ།

    ཐོན་ལས་གོང་འཕེལ་གཏོང་བ་ནི་དབུལ་སྒྲོལ་ཡོང་བའི་རྩ་བའི་ཐབས་ཇུས་ཡིན། མང་ཚོགས་མང་པོ་དབུལ་ཕོངས་སུ་འགྱུར་དོན་ནི་འབབ་འཕར་གྱི་ཐོན་ལས་དང་ཕྱུག་འགྱུར་གྱི་ཐབས་ལམ་མེད་པས་རེད། ཐོན་ལས་དབུལ་སྐྱོར་ལ་ཤུགས་འདོན་པའི་ཀན་སུའུ་ལ་ཇི་ལྟ་བུའི་ལམ་ལུགས་ཇུས་འགོད་དང་སྲིད་ཇུས་བྱེད་ཐབས་ཡོད་དམ་ཞེ་ན།

    “ང་ཚོས་ཁྱད་ལྡན་ཐོན་ལས་འཕེལ་རྒྱས་ཀྱི་ལས་གྲྭ་སྒྲུབ་པ་དང་ཐོན་ལས་རོགས་སྐྱོར་གྱི་མ་དངུལ་དུད་ཚང་དུ་སྤྲོད་པ་སོགས་ཀྱི་བྱེད་ཐབས་ལ་བརྟེན་ནས་ནོར་ལུག་དང་། སྔོ་ཚལ། ཤིང་འབྲས། ཞོག་ཁོག སྨན་བཅས་ཁྱད་ལྡན་ཐོན་ལས་ཆེ་གྲས་དྲུག་འཕེལ་རྒྱས་ཤུགས་ཆེན་བཏང་ཁར་ཞིང་འབྲེལ་གྱི་སྣེ་འདྲེན་ཁེ་ལས་ཁག་གཅིག་གསོ་སྐྱོང་དང་ནང་འདྲེན་བྱས་ཤིང་། ཞིང་པའི་ཆེད་ལས་མཉམ་ལས་ཁང་ཁྱབ་གདལ་རྣམ་པའི་ངང་བསྐྲུན་པ་དང་འབབ་འཕར་ཐོན་ལས་ཀྱི་མ་ལག་འཛུགས་སྐྱོང་མྱུར་པོ་བྱས་པས་མང་ཚོགས་དབུལ་སྒྲོལ་གྱི་བརྟན་པོའི་རང་བཞིན་དང་ཕྱུག་འགྱུར་གྱི་རྒྱུན་སྲིང་རང་བཞིན་སྔར་བས་ཆེ་རུ་ཕྱིན་པ་རེད། ན་ནིང་ཡིག་ཚགས་དང་གཱ་བཟོས་པའི་མི་འབོར་དབུལ་པོ་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་5390ཟིན་པ་དེ་དུས་མཚུངས་ལས་12.3%འཕར་ཡོད། དེ་དང་ཆབས་ཅིག་ལོ་རྒྱུས་རང་བཞིན་ངང་གྲོང་ཚོ་དབུལ་ཕོངས་ཀྱི་མཉམ་སྡེབ་དཔལ་འབྱོར་གྱི‘ནང་སྟོང་གྲོང་ཚོ’མེད་པར་བཟོས་པ་རེད”ཅེས་ལིན་ཏུའོ་ཡིས་བརྗོད།

    “ཡུལ་སྐོར་ནི་ཀན་སུའུ་འཕེལ་རྒྱས་ཀྱི་ཀ་རྟེན་ཐོན་ལས་ཤིག་ཡིན། ཉེ་བའི་ལོ་ཤས་རིང་། ང་ཚོའི་ཡུལ་སྐོར་མི་འབོར་འཕར་ཚད་ཧ་ཅང་མགྱོགས་པ་དང་ན་ནིང་མི་དུང་ཕྱུར་3ཟིན་པ་དང་ཡུལ་སྐོར་གྱི་ཡོང་འབབ་སྒོར་དུང་ཕྱུར་2000ལས་བརྒལ་ཡོད་པ་རེད”ཅེས་ལིན་ཏུའོ་ཡིས་བཤད་བྱུང་།

    གོམ་སྟབས་མ་ལྷོད་པར། དམག་ཡག་པོ་བརྒྱབ་སྟེ་རྣམ་པར་མ་རྒྱལ་བར་མཚམས་མི་འཇོག་པ།

    ལིན་ཏུའོ་ཡིས་བལྟས་ན། དབུལ་སྒྲོལ་འགག་སྒྲོལ་ནི་དམག་འཐབ་ཆེན་པོ་ཞིག་ཡིན་ལ་ཤིན་ཏུ་དབུལ་བའི་ས་ཁུལ་གྱི་དབུལ་སྒྲོལ་འགག་སྒྲོལ་ནི་དམག་འཐབ་ཆེན་པོའི་ནང་གི་ཆེན་པོ་ཞིག་ཡིན། རྒྱལ་ཁབ་ཀྱིས་གཏན་ལ་འཁེལ་བའི“ས་ཁུལ་གསུམ་དང་ཀྲོའུ་གསུམ”གྱི་ཤིན་ཏུ་དབུལ་བའི་ས་ཁུལ་ནང་ཀན་སུའུ་ཡི་ཀ་ཆུ་རང་སྐྱོང་ཀྲོའུ་དང་ཀན་ལྷོ་བོད་རིགས་རང་སྐྱོང་ཀྲོའུ། དཔའ་རིས་བོད་རིགས་རང་སྐྱོང་རྫོང་བཅས“ཀྲོའུ་གཉིས་དང་རྫོང་གཅིག”ཚུད་ཅིང་། ས་ཁུལ་དབུལ་པོ་དེ་དག་རི་ཁུལ་དང་ལུང་ཤུར་དུ་གནས་པ་དང་རང་བྱུང་ཆ་རྐྱེན་ཞན་ཁར་སྣོད་བཅུད་ཁོར་ཡུག་ཞན་པ་དང་འཕེལ་རྒྱས་ཀྱི་རྨང་གཞི་ཤིན་ཏུ་ཞན་པས་དབུལ་སྐྱོར་དབུལ་སྒྲོལ་གྱི་དཀའ་ངལ་ཡང་ཧ་ཅང་ཆེན་པོ་ཡོད་པ་རེད།

    ཀན་སུའུ་ཡིས“ཀྲོའུ་གཉིས་དང་རྫོང་གཅིག”དང་ཞིང་ཆེན་གྱིས་གཏན་ལ་འཁེལ་བའི་ཤིན་ཏུ་དབུལ་བའི་རྫོང་18དེ་དག་གཙོ་གནད་དུ་བྱས་ནས་སྔོན་ལ་སྲིད་ཇུས་ལག་བསྟར་དང་། སྔོན་ལ་མ་དངུལ་དོན་འཁྱོལ། སྔོན་ལ་རྣམ་གྲངས་བཀོད་སྒྲིག་བཅས་བྱས་ཏེ་ཞིང་ཆེན་རིམ་པའི་འགོ་ཁྲིད་ལས་བྱེད་པས་ཤིན་ཏུ་དབུལ་བའི་རྫོང་ལ་དམ་འཛིན་བྱེད་པའི་ལམ་ལུགས་བཟོས་ཤིང་། ལེགས་ཆའི་སྟོབས་ཤུགས་བསྡུ་རུབ་ཀྱིས་ཤིན་ཏུ་དབུལ་བའི་མཁར་རྫོང་ནུས་ཤུགས་ཡོད་རྒུས་གཏོར་བ་རེད། “ན་ནིང་ས་ཁུལ་འདི་དག་ལ་སྤྱད་པའི་ནོར་སྲིད་ཀྱི་ཆེད་དོན་རོགས་སྐྱོར་མ་དངུལ་གྱིས་ཞིང་ཆེན་དེ་ཡོངས་ཀྱི་བཅུ་ཆ་བདུན་ཙམ་བཟུང་བ་དང་། ‘ཀྲོའུ་གཉིས་དང་རྫོང་གཅིག’ཏུ་མི་ཁྲི་13.17དབུལ་པོ་ལས་སྒྲོལ་བ་དང་མི་འབོར་དབུལ་པོ་ཁྲི་18.83བར་ཉུང་དུ་བཏང་ནས་དབུལ་པོར་འགྱུར་ཚད་7.4%བར་ཆག་ཡོད”ཅེས་ལིན་ཏུའོ་ཡིས་ངོ་སྤྲོད་བྱས་པ་རེད།

    --    --

    འགན་འཁུར་རྩོམ་སྒྲིག་པ། བསོད་ནམས་དབང་འདུས།