[ English ] [ 中文 ]
0891-6325020
དབུ་ཤོག>གསར་འགྱུར།>གསར་འགྱུར་དཔྱད་གཏམ།
  • མང་ཚོགས་ཀྱི་བློ་ལ་བབ་པའི་གཞི་རིམ་རྩ་འཛུགས་ཤིག་གཏོད་དགོས།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།   བཀྲ་ཤིས་དོན་གྲུབ།    |    སྤེལ་དུས།   2019-08-23

    མང་ཚོགས་ལ་ཐད་ཀར་ཁ་ཕྱོགས་པའི་གཞི་རིམ་གྱི་ཏང་ཡོན་ནི་མང་ཚོགས་ལ་ཏང་གི་སྲིད་ཇུས་ཤེས་སུ་འཇུག་མཁན་གྱི་ཁྱབ་སྤེལ་བ་ཡིན་ལ། ཏང་གི་མཛད་ཕྱོགས་དང་སྲིད་ཇུས་ལག་ལེན་བསྟར་མཁན་དང་འཛིན་སྐྱོང་བྱེད་མཁན་ཡང་ཡིན། དེས་ན་ཁོང་ཚོའི་གཟུགས་བརྙན་གྱི་ལེགས་ཉེས་ལས་ཏང་དང་རྒྱལ་ཁབ་ཀྱི་གཟུགས་བརྙན་ལ་ཐད་ཀར་ཤུགས་རྐྱེན་ཐེབས་ཀྱི་ཡོད། མང་ཚོགས་ཀྱི་བློ་ལ་བབ་པའི་གཞི་རིམ་རྩ་འཛུགས་བཏོད་ནས་གཞི་རིམ་གྱི་ཏང་ཡོན་ཞེས་པའི་བྱེད་པོ་འདིར་དམ་འཛིན་ཡག་པོ་བྱེད་པར། སྨྱུག་འཛིན་པས་གཤམ་གསལ་གྱི་ལས་དོན་ཡག་པོ་སྒྲུབ་དགོས་པའི་ངོས་འཛིན་བྱེད་ཀྱི་ཡོད།

    གཅིག བྱང་ཚད་མཐོ་བའི་གཞི་རིམ་ཏང་ཡོན་གྱི་དཔུང་ཁག་ཅིག་སྐྱེད་སྲིང་བྱེད་དགོས་ཤིང་། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་ནི་ཏང་གི་དམིགས་ཡུལ་ཡིན། དེས་ན་གཞི་རིམ་ཏང་ཡོན་གྱིས་མང་ཚོགས་ལ་བརྩེ་བ་ཟབ་མོ་བཅངས་ཏེ། མང་ཚོགས་ཀྱིས་བསམ་བློ་གཏོང་སར་བསམ་བློ་གཏོང་བ་དང་། མང་ཚོགས་ཀྱིས་སེམས་ཁྲལ་བྱེད་སར་སེམས་ཁྲལ་བྱེད་པ། མང་ཚོགས་ཀྱི་དཀའ་ངལ་སེལ་རོགས་བྱེད་པ། མང་ཚོགས་ཀྱིས་རེ་སྒུག་བྱེད་པའི་བྱ་བ་སྒྲུབ་པ་བཅས་བྱས་ན་གཞི་ནས་ཏང་ཡོན་དང་མང་ཚོགས་དབར་གྱི་འབྲེལ་བ་ཟབ་ཏུ་ཕྱིན་ནས་གཞི་རིམ་གྱི་ལས་དོན་ཡག་པོ་སྒྲུབ་ཐུབ་རྒྱུ་རེད།

    གཉིས། གཞི་རིམ་གྱི་རྨང་གཞི་བརྟན་དུ་བཏང་ནས་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱེད་དགོས་ཤིང་། བྱ་གཞག་འཕེལ་རྒྱས་གཏོང་བའི་འགག་རྩ་མི་ལ་ཐུག་ཡོད། དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ལས་དོན་དེ་ཏང་ཡོན་དང་ལས་བྱེད་པས་རྒྱ་ཆེའི་མང་ཚོགས་སྒྲིག་འཛུགས་བྱས་ཏེ་སྒྲུབ་དགོས། གྲོང་ཚོ་རིམ་པའི་ཏང་རྩ་འཛུགས་ཀྱི་སྣེ་ཁྲིད་པ་གསོ་སྐྱོང་བྱེད་ཤུགས་ཆེ་རུ་གཏོང་བ་དང་། སྤྱོད་ཡོན་གཉིས་ལྡན་གྱི་མི་སྣ་བསྐོ་གཞག་བྱ་རྒྱུ་མཐའ་འཁྱོངས། ས་གནས་དེ་གའི་ཕྱུག་འགྱུར་འཇོན་ཐང་ཅན་དང་། ཆེད་ལས་མཉམ་ལས་ཁང་གི་འགན་འཁུར་བ། ལས་གཏོད་མི་སྣ་བཅས་གསོ་སྐྱོང་བྱ་རྒྱུར་སྣང་ཆེན་བྱེད་པ། གྲོང་ཚོ་རིམ་པའི་ཚན་ཁག་དང་དཔུང་ཁག་གི་གསོན་ཤུགས་ཕྱོགས་ཡོངས་ནས་ཆེ་རུ་གཏོང་བ་བཅས་བྱས་ཏེ། ཆབ་སྲིད་ཀྱི་བྱང་ཚད་མཐོ་བ་དང་ཕྱུག་འགྱུར་གྱི་འཇོན་ཐང་ཆེ་བའི་ཕུལ་བྱུང་གི་ཤེས་ལྡན་མི་སྣ་གྲོང་ཚོ་རིམ་པའི་ཏང་རྩ་འཛུགས་ཀྱི་ཚན་ཁག་ནང་འདེམས་གཏོང་བྱེད་དགོས།

    གསུམ། གཞི་རིམ་འདི་ཉིད་ལས་བྱེད་པར་ཞིབ་དཔྱད་དང་ལས་བྱེད་པ་འདེམས་སྒྲུག་བྱེད་སའི“རྒྱུགས་ར་ཆེན་པོ”ཤིག་ཏུ་འགྱུར་བ་བྱེད་དགོས་ཤིང་། ཞབས་ཞུ་རྣམ་པའི་ཏང་རྩ་འཛུགས་འཛུགས་པའི་གཙོ་གནད་གཞི་རིམ་དུ་ཡོད་ལ་དཀའ་གནད་ཀྱང་གཞི་རིམ་དུ་ཡོད། དེའང་ཏང་ཡོན་དང་ལས་བྱེད་པའི་ཕྱོགས་བསྡུས་བྱང་ཚད་ཚོད་བགམ་ཐུབ་ཤོས་ཤིག་ཀྱང་ཡིན། གཞི་རིམ་གྱི་ཏང་ཡོན་དང་ལས་བྱེད་པས་ཏང་དང་རྒྱལ་ཁབ་དང་མང་ཚོགས་དབར་གྱི་འབྲེལ་ཟམ་ལྟ་བུའི་ནུས་པ་འདོན་སྤེལ་གང་ལེགས་བྱས་ཏེ། མིག་སྔའི་ལས་ཀ་དང་ཕུགས་ཡུན་གྱི་འཛུགས་སྐྲུན་གཉིས་ཟུང་འབྲེལ་དམ་ཟབ་བྱེད་པ་དང་། མང་ཚོགས་ཀྱི་དགོས་མཁོ་དང་འཛུགས་སྐྲུན་གྱི་དམིགས་ཚད་གཉིས་ཟུང་འབྲེལ་དམ་ཟབ་བྱེད་པ། དོན་དངོས་ལ་གཙིགས་ཆེན་བྱེད་པ། སྐད་ཆ་དྲང་པོ་ཤོད་པ། གོ་ཆོད་ཐབས་ཤེས་འདོན་པ། ཕན་འབྲས་ངོ་མ་ཐོན་པར་བྱེད་པ་བཅས་བྱས་ནས་མང་ཚོགས་ཀྱི་བློས་འཁེལ་བའི་ཏང་ཡོན་དང་ལས་བྱེད་པ་ཞིག་ཏུ་འགྱུར་བ་བྱེད་དགོས་ལ་དོན་དངོས་ཁྲོད་རང་ཉིད་ཞུན་བརྡར་ཐུབ་པ་དང་འཇོན་ཐང་ཆེ་རུ་འགྲོ་བའང་བྱེད་དགོས། གཞི་རིམ་གྱི་ཞིབ་དཔྱད་བརྒྱུད། འཇོན་ཐང་ཅན་ལས་གནས་གལ་ཆེན་ཐོག་བསྐོ་བཞག་བྱས་པའི་ཁར། དེར་རང་སྟོབས་ཀྱི་ནུས་པ་འདོན་སྤེལ་གང་ལེགས་བྱེད་བཅུག་ནས་མི་དམངས་ལ་ཞབས་འདེགས་སྔར་བས་ཡག་པོ་ཞུ་ཐུབ་པ་དང་ཏང་གི་བྱ་གཞག་ལ་བློ་རྩ་བརྟན་པོས་སྐུལ་འདེད་གཏོང་མཁན་ཞིག་ཏུ་འགྱུར་བ་བྱེད་དགོས།

    --    --

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།