[ English ] [ 中文 ]
0891-6325020
དབུ་ཤོག>བོད་རིག་པ་དང་ཆོས་ལུགས།>ཞིབ་འཇུག་འབྲས་བུ།>གསུང་རྩོམ།
  • དེབ་གསར《འཇུ་སྐལ་བཟང་གི་སྙན་ངག་ལ་དཔྱད་པ》ཞེས་པ་དངོས་སུ་བཀྲམས་པ།

  • ཡོང་ཁུངས།   མཆོད་མེ་བོད་ཀྱི་རྩོམ་རིག་དྲ་བ།    |    རྩོམ་པ་པོ།      |    སྤེལ་དུས།   2017-03-17

    བོད་མེ་མོ་བྱ་ལོའི་ལོ་གསར་གྱི་དུས་བཟང་དང་བསྟུན་ནས། དཔལ་རྩལ་གྱིས་བརྩམས་པའི《འཇུ་སྐལ་བཟང་གི་སྙན་ངག་ལ་དཔྱད་པ》ཞེས་པ་དངོས་སུ་བཀྲམས་ཡོད།

    01.jpg

    དེབ་འདི་ནི་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པ་ཞིབ་འཇུག་སློབ་གླིང་གི “ཕུལ་བྱུང་སློབ་ཆེན་དང་ཕུལ་བྱུང་རིག་ཚན”ལ་རྒྱབ་སྐྱོར་བྱེད་པའི་ཞིབ་འཇུག་མ་དངུལ་སྤྱད་ནས། “བོད་ཀྱི་རྩོམ་རིག་ཞིབ་འཇུག་དེབ་ཚོགས”ཞེས་པའི་མུ་འབྲེལ་ཞིབ་འཇུག་ལས་གཞི་སྤེལ་བ་ལས་ཁག་གཉིས་པའི་གྲས་ཡིན་ཞིང་། ཁག་དང་པོ་རུ་བཀྲ་བྷ་ཡི《བོན་གྱི་ལྷ་རབས་ལ་དཔྱད་པ》དང་། བན་དེ་མཁར་གྱི《ལོ་བརྒྱའི་ལྷ་སའི་སྙན་ངག་ཞིབ་འཇུག》ལྕགས་རྡོར་རྒྱལ་གྱི《བོད་ཀྱི་དེང་རབས་སྙན་ངག་རིག་པ》སོགས་དེབ་བདུན་ཡོད་ལ། “བོད་ཀྱི་རྩོམ་རིག་ཞིབ་འཇུག་དེབ་ཚོགས”ཁག་གཉིས་པ་རུ་ད་ལྟའི་བར་དུ་བཙུན་པོ་དོན་གྲུབ་གྱི《ཚེ་རིང་དོན་གྲུབ་ཀྱི་སྒྲུང་གཏམ་ལ་དཔྱད་པ》དང་། ཐེངས་འདིའི《འཇུ་སྐལ་བཟང་གི་སྙན་ངག་ལ་དཔྱད་པ》གཉིས་པར་དུ་བསྐྲུན་ཟིན་ཡོད། ད་དུང་པར་དུ་སྐྲུན་འཆར་ལ་བཀྲ་བྷའི《བོད་ཀྱི་རྩོམ་པ་པོའི་གསར་རྩོམ་ཉམས་མྱོང་ལ་དཔྱད་པ》དང་།བཀྲ་བྷའི《རཱ་མ་ཎའི་རྟོགས་བརྗོད་ཀྱི་འགྲེལ་བ》 བན་དེ་མཁར་གྱི《སྙན་ངག་མེ་ལོང་གི་བརྡ་ཆད་རྣམ་བཤད》 རང་སྒྲའི《རྩོམ་རིག •གསར་རྩོམ •དཔྱད་བརྗོད》བཅས་ཡོད།

    02.jpg

    《འཇུ་སྐལ་བཟང་གི་སྙན་ངག་ལ་དཔྱད་པ》ཞེས་པའི་དེབ་འདི་ནི་རྩོམ་པ་པོ་དཔལ་རྩལ་གྱིས་ཤེས་རམས་པའི་མཐར་ཕྱིན་དཔྱད་རྩོམ་གཞིར་བྱས་ཤིང་། སྣོན་འཕྲི་དང་བཟོ་བཅོས་ལན་འགར་བརྒྱབ་མཐར་དེབ་ཏུ་བསྐྲུན་པ་ཡིན་ལ། དེབ་ཡོངས་སུ་གསར་རྩོམ་གྱི་གོ་རིམ་དང་། བརྩམས་ཆོས་ཀྱི་ཁྱད་ཆོས། རྩོམ་རིག་ཐད་ཀྱི་གྲུབ་འབྲས་བཅས་ལེའུ་ཆེན་པོ་གསུམ་གྱི་སྒོ་ནས་སྤྲོས་ཤིང་། དེ་དག་རེ་རེ་ལའང་དམིགས་བསལ་བརྩམས་ཆོས་རེ་རེ་ཞིབ་ཀློག་གི་ཚུལ་དུ་ཁ་ཚར་བཏབ་ནས་དཔྱད་པར་ཞུགས་ཡོད། གཞན་ཡང་ཕྱིས་འབྱུང་ཞིབ་འཇུག་པ་དང་རྒྱུས་ལོན་གྱི་འདོད་བློ་ཡོད་ས་དག་ལ་ཕན་ཕྱིར་ཟུར་བཀོད་དུ་ལོ་རྒྱུས་དོན་ཆེན་རེའུ་མིག་དང་།  བརྩམས་ཆོས་དཀར་ཆག   པར་དུ་བསྐྲུན་པའི་དེབ་ཀྱི་ཐོ། བཅར་འདྲིའི་ནང་དོན་བདམས་བཀོད་བཅས་འབྲེལ་ཡོད་རྒྱུ་ཆ་ཁག་བཀོད་ཡོད་པས། རིག་གཞུང་གི་དཔྱད་གཞིའི་རིན་ཐང་དང་རྩོམ་རིག་མྱོང་རོལ་གྱི་རིན་ཐང་གང་ཐད་ནས་མི་དམན་པ་ཞིག་ལྡན་ཡོད།

    --    --

    འགན་འཁུར་རྩོམ་སྒྲིག་པ། ཚེ་རིང་ཆོས་སྒྲོན།