[ English ] [ 中文 ]
0891-6325020
དབུ་ཤོག>བོད་རིག་པ་དང་ཆོས་ལུགས།>ཆོས་ལུགས་བསྟན་བཅོས།
  • རང་གཞན་དམ་པའི་ཆོས་ལ་རྒྱུད་བསྐུལ་བའི་ཕྱིར་མི་རྟག་པའི་སྣང་ཚུལ་མགུར་དབྱངས་སུ་མཛད་པ་བཞུགས་སོ།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།   ​ རྒྱལ་དབང་བསྐལ་བཟང་རྒྱ་མཚོ།    |    སྤེལ་དུས།   2016-06-21

    ནེའུ་གསིང་སྤང་ལ་སྐྱེས་པའི། ། སྤང་རྒྱན་མེ་ཏོག་བཀྲ་ཡང་། ། དགུན་གྱི་ཁ་རླུང་འཚུབ་དུས། ། རྡུལ་ཕྲན་ཙམ་དུ་འཐོར་བས། ། ད་ལྟ་མདངས་བཀྲག་མཚར་དུས། ། དཀོན་མཆོག་དྲུང་དུ་ཕུལ་དང་། སྔོན་བསགས་སྦྱིན་པའི་འབྲས་བུ། །  འདོད་དགུའི་ལོངས་སྤྱོད་འབྱོར་ཡང་། ། ནག་ཞིག་གང་ཟག་གཞན་གྱིས། ། བདག་ཟུང་རྫས་སུ་འགྱུར་བས། །  ད་ལྟ་རང་དབང་ཡོད་དུས།  ། སྦྱིན་པའི་ཞིང་ལ་ཕུལ་དང་། ། རྩལ་གསུམ་དར་ལ་རྫོགས་པའི། ། གཡུ་འབྲུག་སྐད་གསེང་མཐོ་ཡང་། །  དབྱར་གསུམ་ནམ་ཟླའི་ཐ་མར། ། སྒྲ་སྐད་ཉམས་པར་འགྱུར་བས། ། ད་ལྟ་མཁའ་ལ་འཕྱོ་དུས། ། དབྱར་རྔ་དལ་བུར་སྒྲོགས་དང་། །  མཐུན་འཇུག་འཇིག་རྟེན་ལས་ལ། །  གསུང་སྙན་འགྱུར་ཁུག་འཁྲོལ་ཡང་། ། ནམ་ཞིག་མགྲིན་པའི་ལམ་ལ། །དབུགས་ཀྱང་ཆད་པར་འགྱུར་བས། །  ད་ལྟ་སྨྲ་ལྕེ་བདེ་དུས། ། གྲག་སྟོང་ཟློ་བར་འབུངས་ཤིག།  མཁའ་ལ་རྒྱན་དུ་ཆགས་པའི། ། སྤྲིན་དཀར་ལངས་ཚོ་གསར་ཡང་། ། དྲག་པའི་རླུང་དང་འཕྲད་ནས། ། ཕྱོགས་བཅུར་འཐོར་བར་ངེས་སོ། ། ད་ལྟ་ལང་ལོང་འཁྲིགས་དུས། ། སྦྲང་ཆར་བཅུད་དུ་ཕོབས་དང་། ། ཁུ་ཁྲག་གཞན་གྱི་རྫས་ལ། ། བདག་ཟུངལུས་འདི་མཆོར་ཡང་། ། ནམ་ཞིག་མི་གཙང་རྫས་བཞིན། ། འབྲེལ་མེད་འདོར་བར་འགྱུར་བས། ། ད་ལྟ་རྩལ་སྟོབས་ལྡན་དུས། ། དགེ་བའི་བྲན་དུ་ཁོལ་ཅིག། དྭངས་བསིལ་ཡིད་ལ་འཐད་པའི། ། ཉལ་འགྲོ་ལྷུང་ལྷུང་འབབ་ཀྱང་། ། མི་རིང་ཐིགས་པ་ཙམ་ཡང་། ། ལུས་མེད་སྐེམ་པར་འགྱུར་གྱི། ད་ལྟ་རྒྱུན་བཟང་འབབ་དུས། ། རྩི་ཐོག་གསོས་སུ་དྲོངས་དང་། ། རང་བདེ་གཞན་ལ་གནོད་པའི། ། ཐབས་ཚུལ་སྣ་དགུ་འགྱུ་ཡང་། ། ནམ་ཞིག་མིང་དོན་ཙམ་ཡང་། ། འཆར་མེད་རྨོངས་པར་འགྱུར་གྱི། ། ད་ལྟ་བློ་རིག་གསལ་དུས། ། ཟབ་རྒྱས་གདམས་ངག་སྒོམས་ཤིག། ཚོང་འདུས་ས་ཡི་ལྟེ་བར། ། ལྷོ་བྱང་ཚོང་ཕྲུག་འཛོམ་ཡང་། ། ཞག་གསུམ་ནང་པར་དུས་སུ། ། སོ་སོར་གྱེས་པར་འགྱུར་བས། ། ད་ལྟ་ཡུད་ཙམ་ཚོགས་དུས། ། འཁོན་དང་མཐུན་གྲོགས་སྤོངས་དང་། ། ཚེ་སྔོན་ལས་ཀྱིས་བཀུག་པའི། ། དགྲ་གཉེན་བྱམས་སྡེ་ཆེ་ཡང་། ། མི་རིང་རིགས་དྲུག་གནས་སུ། ། སོ་སོར་འགྲོ་བར་འགྱུར་བས། ། ད་ལྟ་རིས་སུ་བཅད་ནས། ། དགོས་མེད་ཆགས་སྡང་སྤོངས་ཤིག། སྟོན་དུས་མཁའ་ལ་ཤར་བའི། ། ཉ་རྒྱས་ནམ་འཕང་མཐོང་ཡང་། ། འཛམ་གླིང་ས་འདིར་གནས་པའི། ། སྐྱེ་བོ་ཚ་གདུང་ཅན་ལ། ། ལུས་སེམས་དགའ་བདེ་སྐྱིད་པའི། ། ཤུགས་འབྱུང་འོད་དཀར་འགྱེད་དོ། ། གཞན་ལ་ཕན་བདེ་འདོད་པ། །  རང་སེམས་ཁོང་ན་གནས་ཀྱང་། ། ཕྱོགས་དུས་སྐྱེ་བོ་ཀུན་གྱི། ། དོན་གཉིས་དཔལ་དུ་འགྱུར་བས། ། ལུས་ངག་ཚུལ་འཆོས་སྤངས་ཏེ། ། ལྷག་བསམ་བཟང་པོ་སྐྱེད་ཅིག། གླུ་དབང་གཙུག་གི་ནོར་བུ། ། ཕྱོགས་ལྷུང་རྟོག་པ་མེད་ཀྱང་། ། མཆོད་དང་བཀུར་སྟི་ཆེན་པོས། ། རྩེ་གཅིག་གསོལ་བ་བཏབ་ལ། ། གང་བསམ་རེ་བའི་འབྲས་བུ། ། ལག་རྩེར་སྩོལ་བར་ངེས་སོ། ། བླ་མ་སྐུ་གསུང་དབང་ཕྱུག། འགྲོ་བ་ཉེ་རིང་སྤངས་ཀྱང་། ། མོས་གུས་ལྟེམ་རྐྱང་མེད་པས། །  རྩེ་གཅིག་དྲན་པ་དེ་ལ། །  འདི་དང་ཕྱི་མ་ཀུན་གྱི། ། ལེགས་ཚོགས་འགྲུབ་པར་ངེས་སོ། ། དབང་པོ་བསླད་པའི་མཐུ་ཡིས། ། མཁའ་ལ་སྣང་བཀྲག་མཚར་ཡང་། ། གསོ་དཔྱད་མིག་སྨན་རྣོན་པོས། ། སྦྱངས་པའི་དེ་མ་ཐག་ཏུ། ། རབ་རིབ་སྣང་བ་ལོག་པའི། ། སྟོན་གསལ་རྗེན་པར་འཆར་རོ། ། དངོས་འཛིན་གདོན་གྱིས་དཀྲུགས་པས། ། ཀུན་རྫོབ་ཅི་ཡང་འཆར་མོད། ། འཁྲུལ་བའི་རང་མཚང་གཅོད་པའི། ། རིགས་ཤེས་ལྟ་བའི་ངོ་ན། ། བློ་བྲིད་སྣང་བ་ལོག་པའི། ། གནས་ལུགས་ལྟད་མོ་ལྟོས་ཤིག།  སྟོང་གསལ་མཁའ་ཡི་ངོས་ན། ། ཚུགས་ཐུབ་བདེན་པར་མེད་ཀྱང་། ། རྒྱུ་རྐྱེན་རྟེན་འབྲེལ་མང་པོ། ། ཚོགས་པའི་འཇའ་ཚོན་རི་མོ། ། གཏད་མེད་ཅི་ཡང་འཆར་བའི། ། ངོ་མཚར་འདི་ལ་ལྟོས་དང་། ། དཔྱད་ན་འདི་ཞེས་བྱ་བའི། ། ངོས་བཟུང་ཅི་ཡང་མེད་ཀྱང་། ། རྒྱུ་རྐྱེན་ཆ་ཤས་མང་པོར། ། བཏགས་ཡོད་མིང་ཙམ་འདི་ལ། ། བྱ་བྱེད་ཐམས་ཅད་འཐད་པའི། ། སྒྱུ་མ་འདི་ལ་གཟིགས་དང་། ། བདེན་དངོས་བསླུ་བ་མེད་པའི། ། དམིགས་གཏད་གང་ཡང་མེད་ཀྱང་། ། ཁོག་ཡངས་བྲག་གི་ཕུག་པར། ། སྒྲ་བརྙན་བྲག་ཅའི་དབྱངས་ཀྱིས། ། རང་འཛིན་ཤེས་པ་བསྐྱེད་པའི། ། ནུས་པ་ཐོགས་མེད་བཞིན་དུ། ། སླུ་མེད་དོན་ལ་གྲུབ་པའི། ། སྙིང་པོ་ཆ་ཙམ་མེད་ཀྱང་། ། དོན་ལྡན་ཚིག་གི་ཕྲེང་བ། །  འདི་ལྟར་སྤེལ་བའི་གཏམ་གྱིས། ཀུན་རྫོབ་འགྲོ་བ་མང་པོར། ། ཕན་པ་རྒྱ་ཆེན་གྱུར་ཅིག།

    --    --

    འགན་འཁུར་རྩོམ་སྒྲིག་པ། ཉི་མ་ཚེ་རིང་།