[ English ] [ 中文 ]
0891-6325020
དབུ་ཤོག>བོད་ལུགས་གསོ་རིག>གསོ་རིག་སྨན་ཐང་།
  • ༄༅།།སྔོ་ཡི་བུ་མོ་སྤུན་བདུན་གྱི་རྟོགས་བརྗོད།

  • ཡོང་ཁུངས།   གཡུ་ཐོག་གླེང་སྟེགས།    |    རྩོམ་པ་པོ།   ཕན་ཤུལ་འཆི་མེད་དབང་འདུས།    |    སྤེལ་དུས།   2017-04-21

    ཉོན་མོངས་ནད་གདོན་འཇིགས་པས་ཉེན་པ་ཡི།།

    འགྲོ་ཚོགས་ཟུག་རྔུའི་གདུང་བ་སྙིལ་བྱེད་སྨན།།

    བསིལ་ལྡན་ཡོལ་གོར་སྐྱིལ་མཛད་ཡོན་ཏན་མགོན།།

    ཐུགས་རྗེ་མཚུངས་མེད་གཡུ་ཐོག་པ་དེར་འདུད།།

    དུས་ཀྱི་ཚད་རིམས་དྲུངས་ནས་འཇོམས་པ་ལ།།

    བསིལ་བའི་ཟིལ་པ་བདུད་རྩིར་འཇོ་བའི་གཉེན།།

    སྔོ་ཡི་བུ་མོའི་རྟོགས་པ་བརྗོད་པའི་གཏམ།།

    སྙན་འཇེབས་ངག་གི་ཕྲེང་བའི་ཟོལ་དུ་སྤེལ།།

    ༡ ཧོང་ལེན།

    སྔོན་མོའི་སྤང་དང་གཡའ་ཤག་འགྲིམ་པ་ཡི།།

    བདུད་རྩི་ག་བུར་ཟིལ་གནོན་སྨན་གྱི་ལྕམ།།

    མར་གད་མདངས་ཀྱིས་མཛེས་པའི་ལོ་མ་དང་།།

    གཡུ་དང་མུ་མེན་དུང་གི་མེ་ཏོག་བཀྲ།།

    རྩ་བ་ལྷ་བྱའི་བྲུན་འདྲ་རྨ་ཚད་དང།།

    གཟེར་ཐུང་ལ་སོགས་ཚད་རིམས་ཀུན་འཇོམས་པས།།

    བདུད་རྩི་སྨན་རིགས་ཀུན་གྱི་ནང་བློན་དང་།།

    སྔོ་སྨན་བུ་མོ་བདུན་གྱི་གཅེན་མོ་ཡིན།།

    ༢ བོང་དཀར།

    གངས་ལྗོངས་ས་མཐོའི་རི་སུལ་ཀུན་འགྲིམ་པའི།།

    གངས་ཀྱི་ཞུན་ཆུང་ལོ་མའི་དཔལ་བེའུ་ཅན།།

    གཡུ་དང་དུང་མདོག་འདྲེས་པའི་མེ་ཏོག་དང་།།

    དུང་རྩ་གླང་ཆེན་གཞོན་ནུའི་མཆེ་བ་འདྲ།།

    རིམས་དུག་མཁྲིས་ཚད་འཇོམས་པའི་གཙོ་མོ་རུ།།

    སྨན་ལྗོངས་ཁ་བའི་ཞིང་དུ་བྱོན་པ་ཁྱོད།།

    བདུད་རྩི་སྨན་རྣམས་ཀུན་གྱི་ཕོ་ཉ་དང་།།

    སྔོ་སྨན་བུ་མོའི་གཅེན་མོ་འབྲིང་བར་ངེས།།

    ༣ སྟོང་ཟིལ།

    ས་མཐོའི་རྫ་དང་གངས་ཀྱི་ཆུ་ཤུལ་དུ།།

    ལྗོན་པའི་དབྱིབས་ཅན་རལ་པ་ལྗང་གུས་མཛེས།།

    དྲུག་དཀར་དྲུག་དམར་གཡུ་ཡི་མེ་ཏོག་གིས།།

    དབུ་སྐྱེས་ལན་ཚར་རྒྱན་དུ་སྤུད་པ་མོ།།

    མཁྲིས་ཚད་སྤྱི་དང་གབ་པའི་ཚད་པ་ལ།།

    བདུད་རྩི་ཐིངས་མཆོག་ལས་ཀྱང་བྲིན་པ་ཁྱོད།།

    བསིལ་སྨན་ཟིལ་པའི་བདག་མོ་གཅིག་པུ་སྟེ།།

    སྔོ་སྨན་བདུན་གྱི་གཅེན་མོ་ཆུང་བའང་ལགས།།

    ༤ གཡའ་སྐྱི་མོ།

    རི་རྩེའི་རྫ་མགོ་འགྲིམ་པའི་ངལ་བ་ཡིས།།

    གངས་ཀྱི་ཞུན་ཁུ་འཐུང་བའི་ཟླ་བསིལ་མ།།

    ལོ་མའི་ཁ་དོག་ལྗང་གུའི་ན་བཟའ་ཅན།།

    གསེར་དངུལ་ཟངས་ཀྱི་མེ་ཏོག་ཀུན་ནས་མཛེས།།

    ཁ་བའི་རོ་དང་བསིལ་བའི་ནུས་པ་ཡིས།།

    མཁྲིས་ནད་ཞི་སྦྱོང་བྱེད་པའི་གཙོ་མོ་དང་།།

    སྔོ་ཡི་སྨན་མོ་མཛེས་པའི་གྲལ་རྭ་ནས།།

    ཤིན་ཏུ་གཅེས་པའི་སྤུན་མོ་འབྲིང་བར་གྲགས།།

    ༥ སྤང་རྩི།

    གངས་རིའི་ཀླུང་ཤོད་ཀུན་ཏུ་འགྲིམ་མཁས་པའི།།

    ཆིག་ཐུབ་དཀར་མོ་མཆོང་གི་དབུ་སྐྱེས་ཅན།།

    གཡུ་ལོའི་ཉག་མ་སོག་ལེ་ཆེན་པོའི་དབྱིབས།།

    དུང་གི་རྐང་པས་སྔོན་མོའི་སྤང་ལྗོངས་ཉུལ།།

    རིམས་དུག་ཚ་བ་གསར་རྙིང་དྲེགས་གྲུམ་དང་།།

    ཁྲག་འཁྲུགས་རྒྱུ་གཟེར་འཇོམས་པའི་བདུད་རྩི་རུ།།

    སྨན་གྱི་གཙོ་མོར་བཞེངས་པའི་སྤང་རྩི་ཁྱོད།།

    སྔོ་སྨན་བདུན་གྱི་གཅུང་མོ་རྒན་པར་ངེས།།

    ༦ སུམ་ཏིག

    གཡའ་སྤང་ནགས་དང་བྲག་གི་ཐེམ་སྐས་ཀུན།།

    ལང་ཚོའི་མཛེས་པས་ཁྱབ་པའི་སུམ་ཅུ་ཏིག།

    པད་གདན་ཟངས་གོས་གསེར་གྱི་ཕྲེང་བས་སྤུད།།

    རི་ཡི་བཅུད་ཀུན་གསོལ་བའི་མཛེས་པ་མོ།།

    གསེར་དངུལ་ཟངས་དང་བཅས་པའི་དཔུང་ཚོཊ་ཀྱིས།།

    མཁྲིས་པའི་ཚ་བ་འཇོམས་པའི་ལས་མཛད་ཅིང་།།

    རིགས་ཀྱི་ནུ་མོར་གྲགས་པའི་མཚན་གྱི་དབྱངས།།

    གངས་ཅན་རི་ཡི་མགུལ་དུ་འཁྱུད་པར་རྩོམ།།

    ༧ གང་ཆུང་།

    རབ་མཐོའི་གཡའ་དང་རྫ་མགོ་འགྲིམ་པ་ཡི།།

    དུག་དང་ཚད་འཁྲུའི་གཉེན་པོ་དར་ཡ་ཀན།།

    ལྗང་མདོག་ལོ་མའི་རྒྱལ་མཚན་སྒྲེང་བ་ཡི།།

    རྩེ་མོར་དུང་གི་མེ་ཏོག་ཚོམ་བུར་དགོད།།

    སྔོ་དང་དམར་བའི་འོད་ཀྱིས་འཁྱུད་པ་མོས།།

    ཁྲག་དང་མཁྲིས་པ་ལས་གྱུར་ཚ་བའི་རིགས།།

    མེ་ལ་ཆུ་ཡི་འཕང་ལོ་ཐེབས་པ་ལྟར།།

    འཇོམས་པའི་སྨན་མཆོག་གངས་སྐྱེས་ཨ་བྷི་ཥ།།

    དེ་ལྟར་ཚད་རིམས་ཀུན་སེལ་སྨན་གྱི་ཕུལ།།

    སྔོ་ཡི་བུ་མོ་བདུན་ཞེས་གྲགས་པའི་གཏམ།།

    རིག་བྱེད་ཚིག་ཕྲེང་མཛེས་པའི་ངག་གིས་བསྐུལ།།

    དགེ་བས་ཟུག་རྔུའི་ཚ་གདུང་ཀུན་སེལ་ཤོག།

    --    --

    འགན་འཁུར་རྩོམ་སྒྲིག་པ། ཚེ་རིང་ཆོས་སྒྲོན།